Сув полоси, ватерполо — сувда, яъни тўғри бурчакли ҳовуз (30x20 м, чуқурлиги камида 1,8 м)да тўп билан жамоа бўлиб ўйналадиган спорт ўйини. Ҳар жамоада 7 тадан ўйинчи қатнашади. Ҳовузга 3x0,9 м лик 2 та дарвоза ўрнатилади. Ўйиннинг мақсади — рақиб дарвозасига иложи борича кўп тўп тушириш. Сув полоси тўпининг айланаси 68 – 71 см, оғирлиги 400 – 450 гр. 1967 йилдан бошлаб пластмасса тўп билан ўйналади. Қоидага кўра, мусобақа соф ўйин вақти 5 минутдан бўлган 4 босқичда 2 минутлик танаффус билан ўтказилади. Ҳар қандай усулда сузиш, тўпни 1 қўлда олиб юриш ва отиш мумкин (фақат дарвозабонгина 2 қўлида ўйнайди), қўлида тўп бўлмаган рақибга ҳужум қилиш ман этилади. Қоидани бузганлик тўпни ўйинга киритиш ҳуқуқини рақибга бериш, ўйиндан чиқариб юбориш (45 секунд ёки дарвоза ишғол қилингунга қадар) билан жазоланади.

Ўйиннинг дастлабки қоидаларини шотландиялик В.Уилсон ишлаб чиққан (1876). 19-аср охири — 20-аср бошларидан Сув полоси Европа мамлакатларида оммалаша бошлади. 1926 йил Халқаро ҳаваскорлар сузиш федерацияси (FINA) ҳузуридаги Сув полоси қўмитаси тузилган. 1973 йилдан жаҳон чемпионати мусобақалари ўтказилади. 1900 йилдан Олимпиада ўйинлари дастурига киритилган.

Ўзбекистонда Сув полоси ўйинлари 1946 йилдан уюштирила бошлаган. Мамлакатимизда «Меҳнат», «Локомотив», «Спартак», «Ёшлик» ва бошқа жамоалар бор. Ўзбекистан Сув полоси федерацияси 1993 йил ташкил этилган. Эркин Шагаев спортнинг шу тури бўйича олимпиада чемпионидир.