Фристайл

Фристайл (инглизча free – эркин, style – усул) – тоғ чанғи спорти тури. Фристайлнинг 3 та тури бор: могул, чанғи балета, чанғи акробатикаси.

Могул – паст баланд трассадан тоғ чанғисида тез тушиш;

Чанғи балети – тепаликдан турли шакллар (қадамлар, айланишлар, бурилишлар ва бошқалар) бажариб тушиш;

Чанғи акробатикаси – 2 метрли трамплиндан бир неча акробатик шаклларни бажариб (сальто, пируэтлар ва бошқалар) сакрашдан иборат.

 

Спортчилар бажарган элементларнинг оғир енгиллиги ва ижросининг аниқлиги, шунингдек, артистик маҳорати ҳакамлар томонидан баҳоланади. Фристайл чанғичиларнинг дам олиш тури бўлган. Томошабоплиги учун чанғи бўйича ўтқазиладиган тадбирларга киритилган. Фристайл бўйича биринчи мусобака 1966 йилда АҚШнинг Нью Хампшир шаҳри яқинида ўтказилган. 1978 йилда Халқаро чанғи спорти федерацияси қошида Фристайл бўлими очилган, унга 100 дан ортиқ давлат аъзо (2004). Бу бўлим 1978 йилдан жаҳон кубоги, 1986 йилдан жаҳон чемпионатини ўтказиб келади. 1992 йилда могул, 1994 йилда чанғи акробатикаси олимпиада ўйинлари дастуридан ўрин олди. Фристайл АҚШ, Канада, Австралия, Германия, Франция ва Скандинавия давлатларида ривожланган.

 

Ўзбекистонда Фристайл 20-асрнинг 90-йиллари бошидан оммалашди. Васила Семенчук 1991 йилда жаҳон чемпиони бўлди. Унинг ғалабаларини Л. Черязова давом эттирди. Сергей Бренер, Лариса Удодова, Ирина Черникова каби спортчилар қитьа мусобақаларида муваффақиятли қатнашишган. Ўзбекистон Фристайл федерацияси 1992 йилда тузилган, ўша йили халқаро ташкилотга қабул қилинган. Тошкентдаги қишки спорт турларига ихтисослашган мактабда Фристайл бўлими фаолият кўрсатади. 4 нафар мураббий 800 дан зиёд шуғулланувчига Фристайлдан сабоқ беради.

Поделиться