Минифутбол - Футболнинг турларидан бири минифутбол (футзал) дир. Майдонининг ўлчами 28 – 40х16 – 20 м, дарвозасининг ўлчами 3x2 м, тўпининг оғирлиги 400 – 600 г, айлана диаметрининг узунлиги 60 – 62 см, ўйиннинг соф вақти 40 минут (20 минутдан 2 бўлим), жамоалар мусобақаларда 12 тадан Футболчини рўйхатга киритишади, майдонга чиққан иккала жамоада ҳам 5 тадан Футболчи (биттадан дарвозабон) қатнашади. Минифутбол бўйича жаҳон чемпионати 1989 йилдан, Осиё чемпионати 1998 йилдан бошлаб ўтказилади.

Ўзбекистон минифутбол чемпионати 1997 йилдан бошланган. Мураббий Р.Абдиев бошчилигидаги Ўзбекистон минифутбол жамоаси Осиё чемпионатида 2 ўринни эгаллаган (2001, Теҳрон). Ушбу жамоада А.Нурматов, А.Королёв, Ф.Қудратов сингари Футболчилар маҳоратларини кўрсатишган. Ўзбекистонда 4244 та мини минифутболга мос майдон бор, 3235 киши Футболнинг шу тури билан шуғулланади (2004).